Netflix ka hequr dorë nga oferta për blerjen e Warner Bros. Discovery, duke i hapur rrugën Paramount Skydance për të fituar betejën disa mujore për një nga studiot më të njohura të Hollywood-it.

Bordi i Warner Bros e cilësoi ofertën e përmirësuar të Paramount si “superiore”, pasi kompania rriti propozimin në 31 dollarë për aksion. Netflix konfirmoi se nuk do ta barazonte ofertën, duke deklaruar se marrëveshja në atë çmim “nuk ishte më financiarisht tërheqëse”.

Nëse miratohet nga autoritetet rregullatore në SHBA dhe Evropë, marrëveshja do t’i japë Paramount kontrollin mbi studion, përfshirë platformat e saj të transmetimit dhe rrjetet mediatike si HBO Max dhe CNN.

Megjithatë, procesi nuk është përfundimtar. Prokuroria e Kalifornisë dhe Departamenti Amerikan i Drejtësisë kanë paralajmëruar se marrëveshja do t’i nënshtrohet një shqyrtimi të plotë rregullator.

Një bashkim i tillë pritet të ketë ndikim të madh në industrinë e filmit dhe medias, duke riformatuar ekuilibrat e fuqisë në Hollywood.