Klubi i Girona-s ka konfirmuar se portieri gjerman Marc-Andre ter Stegen do t’i nënshtrohet një ndërhyrjeje kirurgjikale këtë të premte, pas dëmtimit në kofshën e pasme të këmbës së majtë.

Shkalla e saktë e dëmtimit dhe periudha e rikuperimit do të përcaktohen vetëm pas operacionit, duke i dhënë fund pasigurisë së ditëve të fundit rreth gjendjes së tij. Vendimi u mor pas ekzaminimeve shtesë që treguan se dëmtimi ishte më serioz sesa mendohej fillimisht pas ndeshjes ndaj Oviedos.

Ter Stegen kishte luajtur vetëm dy ndeshje zyrtare me fanellën e Gironës dhe nuk kishte shfaqur shenja të dukshme dhimbjeje gjatë lojës, gjë që vonoi diagnostikimin e plotë. Tani, fokusi është zhvendosur te një proces rikuperimi që pritet të jetë i gjatë dhe që ndikon drejtpërdrejt në planet e klubit katalanas, si dhe në objektivat personale të portierit.

Portieri gjerman ishte transferuar në Montilivi me synimin për të rifituar vazhdimësinë dhe rolin e një lojtari kyç, por dëmtimi e ka ndërprerë papritur procesin e përshtatjes. Klubi ka theksuar se nuk do të vendoset ndonjë afat konkret për rikthimin e tij deri pas përfundimit të operacionit, kur do të ketë një panoramë më të qartë për situatën.

Një tjetër goditje e pafat për Ter Stegen, në një moment delikat të karrierës së tij.