Pas triumfit në vitin 2018 dhe humbjes dramatike në finalen e vitit 2022, Franca synon rikthimin në majën e futbollit botëror në Kupën e Botës 2026. Një nga figurat kryesore të kësaj ambicieje është Ousmane Dembélé, i shpallur së fundmi futbollisti më i mirë në botë.

Në një deklaratë për CNN Sports, Dembélé tha se kombëtarja franceze është e vetëdijshme për sfidën që e pret në SHBA, Kanada dhe Meksikë, por beson se skuadra ka përvojën dhe cilësinë për të luftuar për trofeun. Sipas tij, humbja ndaj Argjentinës në Katar ka shërbyer si motiv shtesë për rikthim më të fortë.

Franca do të paraqitet me një ekip të rinovuar, pa emra të njohur si Hugo Lloris, Antoine Griezmann apo Olivier Giroud, por me një kombinim të talenteve të rinj dhe liderëve si Dembélé dhe Kylian Mbappé. Trajneri Didier Deschamps ka ndërtuar një grup që synon të mbajë Francën në rolin e protagonistit.

Një nga ndeshjet më të veçanta për Dembélén do të jetë ajo kundër Senegalit, për shkak të lidhjeve familjare me Afrikën, çka e bën përballjen edhe më emocionale.

Në nivel klubi, viti 2025 ishte historik për Dembélén. Ai udhëhoqi Paris Saint-Germain drejt triumfit të parë në Ligën e Kampionëve, duke fituar gjithashtu Ballon d’Or dhe çmime të tjera prestigjioze individuale.

Me një formë të shkëlqyer dhe një skuadër të bashkuar, Dembélé është i bindur se Franca dhe PSG do të vazhdojnë të synojnë majat edhe në vitin 2026.