Cristiano Ronaldo dhe Al Nassr luajnë sot ndeshjen më të rëndësishme të sezonit, përballë liderit Al Hilal, në një duel që mund të përcaktojë fatin e kampionatit saudit.

Al Nassr renditet në vendin e dytë, katër pikë pas rivalit kryesor. Një humbje do ta thellonte diferencën në shtatë pikë, duke shuar praktikisht shpresat e Ronaldos për të fituar titullin e tij të parë në Arabinë Saudite.

Skuadra e Jorge Jesus ka nevojë për versionin më të mirë të portugezit, i cili ka shënuar katër gola në pesë ndeshje pas rikthimit nga pauza e Kupës Arabe, por forma e tij ende nuk është në kulm. Në ndeshjen e fundit ndaj Al Qadsiah, ndikimi i tij ishte i kufizuar, ndërsa Joao Felix u shfaq lojtari më i rrezikshëm në fazën sulmuese.

Nga ana tjetër, Al Hilal rikthen Theo Hernandezin pas pezullimit dhe mbështetet te një repart ofensiv i frikshëm me Marcos Leonardo, Darwin Nunez, Salem Al Dawsari dhe Malcom. Megjithatë, të dyja skuadrat vuajnë mungesa të rëndësishme për shkak të Kupës së Afrikës: Sadio Mane mungon te Al Nassr, ndërsa Bono dhe Koulibaly te Al Hilal.

Kjo sfidë është jetike për Ronaldon: sot ai luan jo vetëm për sezonin e Al Nassr, por edhe për mundësinë reale që pas pesë vitesh të ngrejë një trofe kampionati në nivel klubesh.