Filmi “Marty Supreme”, me Timothée Chalamet në rolin kryesor, ka shënuar një sukses historik për studion A24, duke regjistruar 28.3 milionë dollarë në hapjen e tij në SHBA, sipas të dhënave nga The Numbers.

Ky rezultat përfaqëson hapjen më të madhe në historinë e A24, duke lënë pas filmin Civil War, i cili kishte debutuar me 25.5 milionë dollarë në prill të vitit 2024. Edhe pse “Marty Supreme” pati një periudhë më të gjatë hapjeje, performanca e tij mbetet shumë e fortë, sidomos në një javë konkurruese në kinema.

Filmi, i drejtuar nga Josh Safdie, ka një buxhet prej 60–70 milionë dollarësh, çka e bën prodhimin më të shtrenjtë të A24 deri më sot. Brenda pesë ditëve të para, filmi ka rikuperuar pothuajse gjysmën e këtij buxheti.

“Marty Supreme” është pritur jashtëzakonisht mirë nga kritikët, duke marrë 95% në Rotten Tomatoes, ndërsa interpretimi i Timothée Chalamet po konsiderohet si një nga më të mirët e vitit. Aktori shihet gjithashtu si favorit për çmimin Oscar për Aktorin më të Mirë, që do të ishte i pari i karrierës së tij.

Suksesi i filmit konfirmon edhe një herë se A24, përveç vlerësimeve kritike dhe çmimeve, po shndërrohet gjithnjë e më shumë në një forcë serioze në box office-in global.