Një mjek nga Kalifornia është dënuar me tetë muaj arrest shtëpie dhe tre vite liri me kusht, duke u bërë personi i dytë që merr dënim penal në lidhje me vdekjen nga mbidoza të yllit të serialit “Friends”, Matthew Perry.

Bëhet fjalë për Dr. Mark Chavez, me bazë në San Diego, i cili ka pranuar fajësinë për akuza penale që lidhen me shpërndarjen e paligjshme të ketaminës – substancë që u gjet në nivele të larta në organizmin e aktorit pas vdekjes së tij në vitin 2023, në banesën e tij në Los Angeles.

Sipas hetimeve, Chavez ishte pjesë e një rrjeti ilegal që furnizonte Perry-n me ketaminë përmes recetave të rreme dhe shitjeve të fshehta. Ai e siguronte substancën nga klinika e tij dhe nga një distributor me shumicë, duke përdorur emrin e një ish-pacienteje pa dijeninë apo pëlqimin e saj.

Ketamina më pas i shitej një mjeku tjetër, Salvador Plasencia, i cili e furnizonte drejtpërdrejt aktorin. Plasencia u dënua më herët këtë muaj me 30 muaj burg. Hetimi zbuloi gjithashtu mesazhe private tronditëse, ku mjekët diskutonin përfitimet financiare nga varësia e Perry-t, madje duke e tallur atë.

Përveç dy mjekëve, tre persona të tjerë – përfshirë asistentin personal të aktorit dhe një tregtare droge e njohur si “Mbretëresha e Ketaminës” – pritet të përballen me dënime në muajt në vijim.

Autopsia zyrtare konfirmoi se vdekja e Matthew Perry u shkaktua nga efektet akute të ketaminës, duke mbyllur një kapitull tragjik në jetën e aktorit që fitoi zemrat e miliona shikuesve në mbarë botën.