Mbi 170 punëtorë të sigurimit, të angazhuar përmes një kompanie private nga Komuna e Prishtinës, kanë protestuar dje para ndërtesës së Komunës, pasi prej tre muajsh nuk kanë marrë pagat e tyre. Ndërprerja e punës ka lënë pa mbikëqyrje sigurie shumë institucione publike dhe private në kryeqytet.

Punëtorët thanë se mungesa e pagave dhe kontratave të rregullta po u shkakton probleme serioze në jetën e përditshme.
“Ka njerëz me kredi, me probleme shëndetësore, me familje për të mbajtur. Janë tre muaj pa paga”, deklaroi punëtori i sigurimit, Bedri Haradinaj.

Nga ana tjetër, Muharrem Jonuzi, i angazhuar në një çerdhe në Dardani, theksoi se nuk janë paguar as ndërrimet e natës e as pushimet vjetore, duke shtuar se punëtorët do të vazhdojnë ndaljen e punës derisa të gjendet zgjidhje.

Komuna e Prishtinës, nëpërmjet Drejtorisë për Siguri dhe Emergjenca, ka bërë të ditur se kërkesa për procedimin e pagesave është bërë qysh javën e kaluar. Sidoqoftë, për shkak të bllokimit të mjeteve financiare të Kryeqytetit, pagesat ende nuk kanë mundur të realizohen, pavarësisht, siç thuhet, përkushtimit për ta zgjidhur këtë çështje sa më shpejt.