Oksfordi paralajmëron: Videot “deepfake” të IA-së po dëmtojnë mjedisin

Teknologji | 27.10.2025 Ora 7:53

Teknologjitë e inteligjencës artificiale, si platformat që krijojnë video “deepfake”, po përhapen me shpejtësi në rrjete sociale, duke gjeneruar pamje tepër reale të personazheve publikë dhe madje edhe të njerëzve të ndjerë.

Megjithatë, një ligjërues në Universitetin e Oksfordit, Dr. Kevin Grecksch, ka paralajmëruar se pas këtyre videove fshihet një ndikim serioz në mjedis.

Sipas tij, procesi i krijimit të videove të tilla ndodh në qendra të mëdha të dhënash që kërkojnë shumë energji elektrike dhe sasi të mëdha uji për ftohje.

Dr. Grecksch u bëri thirrje përdoruesve të jenë më të kujdesshëm dhe të vetëdijshëm për këtë ndikim, duke theksuar se çdo video e krijuar nga AI ka një “kosto të padukshme” për planetin.

Ai shton se zhvillimi i teknologjisë është i pashmangshëm, por kërkon më shumë përgjegjësi ndaj burimeve natyrore që përdoren për ta mbështetur atë.