Elon Musk ka deklaruar se paketa e re gjigante e pagës që mund ta bëjë njeriun e parë trilioner në botë nuk ka për qëllim pasurimin personal, por ruajtjen e kontrollit mbi Teslën.
Gjatë një telefonate me investitorët, Musk tha se kjo paketë është “e nevojshme për të pasur ndikim të mjaftueshëm në kompani”, por jo aq sa “të mos mund të shkarkohet nëse shkon në drejtim të gabuar”.

Ai kritikoi ashpër dy firma të njohura që këshillojnë aksionarët, ISS dhe Glass Lewis, duke i quajtur “terroristë korporativë”. Sipas tij, këto kompani kanë bërë rekomandime që, po të ishin ndjekur, do të kishin dëmtuar seriozisht të ardhmen e Teslës.

Edhe pse ISS dhe Glass Lewis kanë rekomanduar kundër pakove të mëparshme të pagës për Musk, aksionarët e Teslës i kanë miratuar ato me shumicë votash. Gjykata e Delaware i hodhi poshtë dy herë këto marrëveshje, por një votim i ri e riktheu mbështetjen e aksionarëve.

Aktualisht, Musk zotëron 413 milionë aksione të Teslës dhe kërkon të rrisë pjesën e tij në kompani me rreth 10%. Paketa e re, e cila është në pritje të miratimit, do t’i jepte mundësinë të blejë 423 milionë aksione të tjera – me vlerë potenciale deri në 1 trilion dollarë, nëse Tesla arrin objektivat e rritjes së parashikuara.

Bordi i Teslës ka deklaruar se kjo paketë është thelbësore për ta mbajtur Musk të fokusuar në kompani, përkundër angazhimeve të tij në SpaceX, xAI dhe platformën sociale X (ish-Twitter).

Në dokumentin zyrtar të kompanisë thuhet:
“Thjesht, ruajtja dhe motivimi i Elon është thelbësor për të arritur qëllimet dhe për ta bërë Teslën kompaninë më të vlefshme në histori.”