Një marrëveshje e shumëpritur për aplikacionin TikTok mund të jetë shumë afër përfundimit. Presidenti amerikan Donald Trump dhe homologu i tij kinez, Xi Jinping, pritet të diskutojnë këtë të premte kushtet e marrëveshjes, pasi palët kanë arritur një “kornizë” dakordimi gjatë kësaj jave.

Raportimet sugjerojnë se operacionet e TikTok në SHBA mund të shiten tek një konsorcium kompanish amerikane, përfshirë Oracle dhe disa fonde investimi. Megjithatë, çështja kryesore mbetet algoritmi i aplikacionit – sistemi i rekomandimeve që e bën TikTok-un aq tërheqës për përdoruesit. Pekini ka sinjalizuar se mund të lejojë vetëm licencimin e këtij algoritmi, jo transferimin e tij.

Një version i ri i TikTok në SHBA mund të ofrojë përmbajtje më të kufizuar, duke ruajtur ndërkohë funksionimin e aplikacionit. Ekspertët e teknologjisë theksojnë se kjo marrëveshje nuk është vetëm për një aplikacion argëtues, por një pjesë e betejës së madhe mes SHBA-së dhe Kinës për dominim teknologjik dhe ekonomik.

Nëse arrihet marrëveshja, ajo do të shënojë një “fitore të dyfishtë”: TikTok mbetet i pranishëm në tregun amerikan, ndërsa Kina ruan kontrollin mbi “sekretin” e suksesit të tij.