Qeveria australiane ka njoftuar një objektiv të ri për klimën: reduktimin e emetimeve të karbonit me të paktën 62% deri në vitin 2035, duke u krahasuar me nivelet e vitit 2005. Ky vendim vjen pas rekomandimeve të Autoritetit për Ndryshimet Klimatike, i cili kishte sugjeruar një ulje mes 62% dhe 70%.

Kryeministri Anthony Albanese tha se plani është i përgjegjshëm, i mbështetur nga shkenca dhe i bazuar në teknologji të provuara. Ai pritet ta konfirmojë këtë zotim edhe në Asamblenë e Përgjithshme të OKB-së në fund të muajit.

Australia është kritikuar shpesh për varësinë e saj nga karburantet fosile, pavarësisht synimeve për t’u bërë një “superfuqi e energjisë së rinovueshme”. Vetëm javën e kaluar, një nga projektet më të mëdha të gazit, North West Shelf, mori lejen të operojë deri në vitin 2070, një vendim i cili është cilësuar si “tradhëti” nga ambientalistët.

Ekspertët paralajmërojnë se vendi tashmë po përjeton ngrohje mbi 1.5°C, me pasoja të dukshme si zjarret masive, përmbytjet historike dhe dëmtimi i shkëmbinjve koralorë. Një raport i fundit paralajmëroi se nëse nuk ndërmerren hapa më të fuqishëm, deri në 1.5 milionë njerëz mund të rrezikohen nga ngritja e nivelit të detit dhe humbje pronash që kapin shifrën e 611 miliardë dollarëve australianë.