Më shumë se një milion hektarë tokë janë djegur deri tani këtë vit në Bashkimin Evropian, duke e bërë sezonin e vitit 2025 më të rëndin për zjarret që nga fillimi i regjistrimeve në vitin 2006.

Sipas të dhënave të Copernicus European Forest Fire Information System (EFFIS), Spanja dhe Portugalia janë vendet më të prekura, me rreth 684 mijë hektarë të djegur vetëm në gadishullin Iberik – katër herë më shumë se sipërfaqja e Londrës së Madhe. Vetëm Spanja ka regjistruar mbi 400 mijë hektarë, gjashtëfishi i mesatares sezonale, ndërsa Portugalia ka shënuar një rekord prej 270 mijë hektarësh.

Zjarret kanë prekur edhe zona të mbrojtura si parku kombëtar Picos de Europa, si dhe rrugë të njohura të pelegrinazhit Camino de Santiago, të cilat zakonisht tërheqin mbi 100 mijë vizitorë në muajt e verës.

Shkencëtarët lidhin drejtpërdrejt intensifikimin e zjarreve me ndryshimet klimatike. Përveç dëmeve në pyje dhe biodiversitet, ato kanë shkaktuar edhe pasoja klimatike të mëtejshme: vetëm në Spanjë, emetimet e dioksidit të karbonit nga zjarret kanë arritur në 17.68 milionë ton, një nivel rekord që tejkalon emetimet vjetore të të gjithë Kroacisë.

Ekspertët paralajmërojnë se cikli është i rrezikshëm: temperaturat më të larta krijojnë kushte për zjarre më të mëdha, ndërsa vetë zjarret lëshojnë më shumë CO2 që përshpejton ngrohjen globale.

Studiuesit theksojnë se përveç reduktimit të përdorimit të karburanteve fosile, menaxhimi i pyjeve dhe masat parandaluese në zonat e rrezikuara janë thelbësore për të kufizuar përmasat e zjarreve në të ardhmen.