Çdo vit, më 26 gusht, shënohet Dita Ndërkombëtare e Qenve, një ditë kushtuar njërit prej kafshëve më të dashura e më besnike të njeriut. Kjo ditë ka për qëllim jo vetëm të festojë lidhjen e veçantë mes qenve dhe njerëzve, por edhe të rrisë ndërgjegjësimin për kujdesin, mirëqenien dhe mbrojtjen e tyre.

E krijuar për herë të parë në vitin 2004 nga aktivistja amerikane Colleen Paige, kjo ditë i fton njerëzit në mbarë botën të tregojnë dashuri ndaj qenve të tyre, të adoptojnë kafshë nga strehimoret dhe të kontribuojnë në mbrojtjen e racave të ndryshme.
Qeni, i njohur si "miku më i mirë i njeriut", ka luajtur rol të pazëvendësueshëm gjatë historisë – duke qenë roje, ndihmës në gjueti, shokë besnikë, e madje edhe shpëtimtarë në situata emergjente. Sot, ata shihen gjithnjë e më shumë si pjesë e familjes, duke sjellë gëzim, dashuri dhe shoqëri të pakushtëzuar.

Në mbarë botën, kjo ditë shënohet me aktivitete të ndryshme – nga fushata për adoptime, deri te nisma për mbrojtjen e të drejtave të kafshëve dhe kujdesin veterinar. Specialistët theksojnë rëndësinë e ushqimit të shëndetshëm, kujdesit mjekësor dhe trajtimit me dashuri e respekt të çdo qeni.