Zjarr i madh në Francë - më i rëndi në 75 vitet e fundit

Të Tjera | 08.08.2025 Ora 8:18

Franca po përballet me zjarrin më të madh në historinë e saj moderne, që nga viti 1949. Më shumë se 17 mijë hektarë pyje dhe tokë janë përfshirë nga flakët në rajonin e Aude, në jug të vendit, që nga dita e martë. Zjarri, i ndikuar nga erëra të fuqishme dhe thatësira ekstreme, është përhapur me shpejtësi, duke lënë pas një viktimë dhe 13 të plagosur, përfshirë 11 zjarrfikës.

Edhe pse autoritetet raportojnë se zjarri është vënë nën kontroll, ai pritet të vazhdojë të digjet për disa ditë. Zonat e prekura janë shpallur të pasigurta, rrugët janë të bllokuara për shkak të telave të rënë të energjisë, ndërsa shumë banorë janë evakuuar dhe strehuar në qendra emergjente.

Pamjet satelitore tregojnë përmasat e shkatërrimit, veçanërisht në fshatrat Ribaute, Saint-Laurent-de-la-Cabrerisse dhe Jonquières – ky i fundit ka humbur rreth 80% të sipërfaqes së tij. Zyrtarët francezë e kanë cilësuar këtë ngjarje si pasojë direkte e ndryshimeve klimatike, duke kërkuar ndërgjegjësim dhe kujdes të shtuar në muajt e thatë dhe të nxehtë të verës.