Elon Musk u shfaq në transmetim të drejtpërdrejtë vonë mbrëmë për të zbuluar Grok 4, modelin më të fundit nga xAI, duke pretenduar një “shkallë të jashtëzakonshme progresi” për chatbot-in.

Modeli i ri u cilësua si “asistenti më i fuqishëm i AI-së në botë”, dhe në një moment transmetimi kishte më shumë se 1.5 milion shikues.

Gjatë transmetimit të drejtpërdrejtë, punonjësit diskutuan performancën e Grok 4 në një test akademik të njohur për modele të mëdha gjuhësore, “Provimi i Fundit i Njerëzimit”, i cili përmban më shumë se 2,500 pyetje nga fusha të ndryshme si matematika, shkenca dhe gjuhësia.
 
Kompania tha se Grok 4 ishte në gjendje të zgjidhte rreth një të katërtën e pyetjeve të bazuara në tekst pa mjete shtesë. Për krahasim, OpenAI tha në shkurt se mjeti i saj i Kërkimit të Thellë mund të zgjidhte rreth 26 përqind të pyetjeve të bazuara në tekst.

Musk shprehu shpresën se Grok do të ishte në gjendje të komunikonte me botën përmes robotëve humanoide.
“Pres që Grok të zbulojë teknologji të reja, vërtet të dobishme deri vitin tjetër, më së voni, dhe ndoshta deri në fund të këtij viti. Mund të marrë formë fizike vitin tjetër. Mendojeni pak”, tha Musk në mënyrë misterioze.

Gjatë transmetimit, Musk pranoi se “ndonjëherë shqetësohet se inteligjenca artificiale do ta tejkalojë shumë inteligjencën njerëzore”, dhe se pyet veten “nëse kjo do të jetë e keqe apo e mirë për njerëzimin”.

“Mendoj se do të jetë mirë. Me shumë mundësi do të jetë mirë. Megjithatë, jam pajtuar disi me faktin se, edhe nëse nuk është mirë, të paktën do të doja të jetoja për ta parë”, shtoi Musk.

Përveç kësaj, Musk iu referua edhe “shpërthimeve” të fundit të chatbot-it, përkatësisht rasteve në të cilat, pas një përditësimi, filloi të fliste duke lavdëruar Adolf Hitlerin dhe duke nënçmuar hebrenjtë.
Lidhur me këtë, kreu i X tha: “Grok ishte shumë në përputhje me kërkesat e përdoruesve. Shumë i etur për të kënaqur dhe për t’u manipuluar, në thelb. Kjo po zgjidhet”.