Ndonëse mund të na duket i bezdisshëm dhe i neveritshëm, sekrecioni i hundës – ose siç njihet ndryshe, “snot” – luan një rol jetik në mbrojtjen e organizmit tonë dhe mund të zbulojë shumë për shëndetin tonë të përgjithshëm.

Nga teoritë e Greqisë së Lashtë te mrekullitë e mjekësisë moderne

Në Greqinë e Lashtë, mjeku Hipokrati besonte se mukusi ishte një nga katër “lëngjet jetike” të trupit, të cilat ndikojnë në personalitetin dhe shëndetin e njeriut. Sot, e dimë që kjo nuk është e vërtetë – por gjithsesi, mukusi i hundës është një nga barrierat më të rëndësishme natyrore kundër mikrobeve, viruseve, ndotjes dhe alergeneve.

Çfarë tregon ngjyra e mukusit?

Profesoresha Daniela Ferreira nga Universiteti i Oksfordit shpjegon se vetë ngjyra e sekrecionit të hundës mund të jetë një “termometër vizual” për trupin:

• E tejdukshme – zakonisht shenjë e një alergjie apo irritimi nga pluhurat.

• E bardhë – sinjal se trupi po lufton një virus.

• E verdhë ose jeshile – përmban qeliza të vdekura të bardha të gjakut që po pastrojnë trupin.

• E kuqërremtë ose rozë – shenjë e gjakderdhjes së lehtë për shkak të fërkimeve të shumta.

Mikrobioma e hundës – një univers më vete

Shumë njerëz janë të njohur me mikrobiomën e zorrëve, por studiuesit tani po e vënë theksin edhe te mikrobioma e mukusit të hundës. Ajo ndikohet nga mosha, gjinia, dieta, vendbanimi – madje edhe nga duhanpirja apo vapingu – dhe ka ndikim të madh në imunitet.

“Çdo njeri ka mikrobiomën e vet unike në hundë,” shpjegon Ferreira.

Studiuesit në Suedi kanë eksperimentuar duke injektuar mukus nga njerëz të shëndetshëm në hundët e pacientëve me probleme kronike si rinosinusiti – dhe rezultatet ishin pozitive: simptomat si kolla dhe dhimbja e fytyrës u reduktuan me 40%.

Diagnostikë me një fshirje hunde

Dr. Jennifer Mulligan nga Universiteti i Floridës përdor mukusin për të diagnostikuar dhe trajtuar probleme si rinosinusiti kronik, humbja e nuhatjes, e madje edhe sëmundje të mushkërive. Analizat tregojnë se proteina IL-26 në mukus mund të sinjalizojë rrezikun për zhvillimin e sëmundjes pulmonare obstruktive kronike (COPD), një nga shkaktarët kryesorë të vdekjeve globale.

E ardhmja: Snot dhe inteligjenca artificiale

Kompani teknologjike si Diag-Nose kanë zhvilluar pajisje të miratuara nga FDA për marrjen precize të mostrave të mukusit të hundës dhe po përdorin AI për të analizuar profilet e mikrobiomës.

“Mukusi është e ardhmja e mjekësisë së personalizuar,” thotë Mulligan.

Ai po përdoret gjithashtu për të zbuluar ndotjen nga metalet e rënda, për të identifikuar rrezatimin në trup dhe për të hulumtuar sëmundje si asma, kanceri i mushkërive, Alzheimeri dhe Parkinsoni.