Rekordi për ditën më të nxehtë të vitit në Britaninë e Madhe mund të thyhet për të dytën ditë me radhë, me temperatura që pritet të arrijnë deri në 33°C të premten, sipas Met Office.

Kushtet e nxehta dhe të thata po vazhdojnë, ndërsa shumë rajone në Angli pritet të kalojnë kufirin për shpalljen zyrtare të një vale të nxehti – që kërkon temperatura të larta të qëndrueshme për të paktën tri ditë radhazi.

Agjencia për Sigurinë Shëndetësore në Mbretërinë e Bashkuar (UKHSA) ka lëshuar një alarm portokalli për gjithë Anglinë, për herë të parë që nga shtatori i vitit të kaluar. Ky paralajmërim nënvizon ndikimet e mundshme serioze në sistemin shëndetësor dhe social, veçanërisht për të moshuarit dhe personat me sëmundje kronike.

Pika kulmore e nxehtësisë pritet të jetë të shtunën, me temperatura që mund të arrijnë deri në 34°C. Të dielën pritet një rënie e lehtë – me temperatura që do të bien në fund të 20-shave në jug dhe rreth 25°C në pjesët tjera të vendit.

Në krahasim me rekordet e mëparshme, këto temperatura janë ende nën nivelin ekstrem të qershorit 1976, kur u shënuan 35.6°C, por rreziku për shëndetin dhe mjedisin mbetet i lartë.

Rritja e temperaturave i është atribuar një zone të fuqishme presioni të lartë që ka tërhequr ajër të nxehtë nga Evropa Perëndimore. Ndërkohë, sipas Këshillit Kombëtar të Shefave të Zjarrfikësve, mbi 500 zjarre janë regjistruar këtë vit në Angli dhe Uells – një rritje e jashtëzakonshme prej 717% krahasuar me të njëjtën periudhë të vitit të kaluar.

Autoritetet i bëjnë thirrje qytetarëve që të kenë kujdes gjatë kohës që kalojnë jashtë, për të shmangur rrezikun nga vala e të nxehtit dhe për të ndihmuar në parandalimin e zjarreve.