Javën e ardhshme, në Arabinë Saudite, do të zhvillohen bisedime mes Shteteve të Bashkuara dhe Ukrainës, ka konfirmuar presidenti Volodymyr Zelensky, duke shprehur shpresën për një "takim domethënës".

Megjithëse Zelensky do të jetë i pranishëm në Mbretërinë e Gjirit, ai nuk do të marrë pjesë drejtpërdrejt në bisedime. Presidenti ukrainas theksoi se Kievi po punon për të arritur një paqe të shpejtë dhe të qëndrueshme, ndërsa SHBA-ja, përmes të dërguarit të posaçëm të Donald Trump, Steve Witkoff, ka bërë të ditur se synon të diskutojë një "kornizë" për t'i dhënë fund luftës mes Rusisë dhe Ukrainës.

Këto bisedime vijnë pas tensioneve të fundit mes Zelenskyt dhe Trump-it, të cilët u përplasën publikisht javën e kaluar në Shtëpinë e Bardhë. Si pasojë, SHBA pezulloi ndihmën ushtarake për Ukrainën dhe ndaloi ndarjen e inteligjencës ushtarake.

Në përpjekje për të riparuar marrëdhëniet, Zelensky i ka dërguar një letër Trump-it, që sipas Witkoff, përmbante një "falje" dhe një "ndjenjë mirënjohjeje", duke shpresuar se kjo do t'i rikthejë gjërat në rrjedhën e duhur mes dy vendeve.

Ndërkohë, presidenti rus Vladimir Putin ka deklaruar se Moska kërkon një paqe që garanton "qetësi afatgjatë" për Rusinë, duke shtuar se nuk do të heqin dorë nga asgjë që i përket atyre.

Në këtë klimë tensioni, bisedimet e ardhshme në Arabinë Saudite shihen si një hap i rëndësishëm drejt përcaktimit të rrugës për një marrëveshje paqeje, ndërsa presioni ndërkombëtar mbi Moskën për t'i dhënë fund luftës vazhdon të rritet.