Një konsorcium investitorësh i udhëhequr nga Elon Musk ka bërë një ofertë prej 97.4 miliardë dollarësh për të blerë OpenAI, kompaninë që krijoi ChatGPT.

Avokati i Musk, Marc Toberoff, konfirmoi se oferta për të gjitha asetet e OpenAI është dorëzuar bordit të kompanisë. Kjo përpjekje shënon një tjetër kapitull në rivalitetin mes Musk dhe CEO-së së OpenAI, Sam Altman.

Altman e refuzoi publikisht ofertën përmes një postimi në platformën sociale X, duke thënë me ironi: "Jo faleminderit, por ne mund të blejmë Twitter për 9.74 miliardë dollarë nëse dëshiron."

Musk dhe Altman e themeluan OpenAI në vitin 2015 si një organizatë jofitimprurëse, por rrugët e tyre u ndanë në 2018. Altman po e shndërron kompaninë në një entitet fitimprurës, gjë që Musk e konsideron si largim nga misioni fillestar për zhvillimin e inteligjencës artificiale në dobi të njerëzimit.

Oferta e Musk mbështetet nga kompania e tij e AI, xAI, si dhe nga fondet investuese Baron Capital Group dhe Valor Management. Oferta është shumë më e ulët se vlera e fundit e OpenAI prej 157 miliardë dollarësh në tetor 2024, ndërsa në negociatat e fundit vlerësimi i saj ka arritur në 300 miliardë dollarë.

Ndërkohë, OpenAI ka shpallur një projekt të ri gjigant prej 500 miliardë dollarësh për ndërtimin e infrastrukturës AI në SHBA, në bashkëpunim me Oracle dhe investitorë nga Japonia dhe Emiratet e Bashkuara Arabe. Projekti, i quajtur The Stargate Project, u prezantua në Shtëpinë e Bardhë nga presidenti Donald Trump si investimi më i madh në historinë e AI.

Përkundër faktit se është këshilltar i afërt i Trump, Musk ka shprehur skepticizëm për këtë projekt, duke pretenduar se nuk ka kapitalin e premtuar – megjithatë, ai nuk ka ofruar prova për këtë deklaratë.