Festat e Vitit të Ri Hënor në Kinë shënuan rekorde të reja në udhëtime dhe shpenzime, duke i dhënë një shtysë të rëndësishme ekonomisë së vendit.

Gjatë festës tetë-ditore, e cila filloi më 28 janar, numri i udhëtimeve të brendshme arriti në 501 milionë, një rritje prej 5.9% krahasuar me vitin e kaluar, sipas Ministrisë së Kulturës dhe Turizmit. Edhe shpenzimet turistike u rritën me 7%, duke arritur në 677 miliardë juanë (93 miliardë dollarë).

Udhëtimet ndërkufitare gjithashtu patën një rikthim të fuqishëm, me mesatarisht 1.795 milionë hyrje-dalje ditore në Kinë—një shifër që tejkalon lehtë nivelet para pandemisë. Ky rritje u nxit kryesisht nga vizitorët e huaj, numri i të cilëve u rrit me gati 23% krahasuar me vitin 2024. Kjo tendencë pason zgjerimin e fundit të politikave pa viza nga Kina për të tërhequr më shumë turistë ndërkombëtarë.

Festat gjithashtu nxitën një bum në industrinë e kinemasë, me një numër rekord prej 187 milionë shikuesish dhe të ardhura nga biletat që arritën një kulm historik prej 9.5 miliardë juanësh (1.32 miliardë dollarë). Filmi i animuar Nezha 2 u bë filmi me fitimet më të larta në historinë e kinemasë kineze.

Megjithëse ky vrull ekonomik është pozitiv, ekspertët paralajmërojnë se mund të jetë i përkohshëm. Iniciativat qeveritare, si politikat për stimulimin e konsumit dhe subvencionet për pajisje shtëpiake dhe automjete, kanë ndihmuar në rritjen e kërkesës. Megjithatë, sfidat afatgjata ekonomike, si papunësia e të rinjve dhe tregu i vështirë i pasurive të paluajtshme, mbeten shqetësuese.

Ndërkombëtarisht, Kina përballet me tensione në rritje me SHBA-në, pas tarifave të reja të vendosura nga administrata Trump. Në kundërpërgjigje, Pekini ka njoftuar masa hakmarrëse, duke përshkallëzuar përplasjet tregtare mes dy ekonomive më të mëdha në botë.

Megjithëse shifrat e Vitit të Ri Hënor sjellin optimizëm, rimëkëmbja ekonomike e Kinës do të varet nga stabiliteti i brendshëm dhe ndërkombëtar.