Edinburgh do të jetë qyteti i parë në Mbretërinë e Bashkuar që zbaton një taksë për turistët që kalojnë natën në kryeqytetin skocez, duke nisur nga mesi i vitit 2026.

Vizitorët që qëndrojnë në hotele, bujtina, hostele, apartamente me vetëshërbim ose shtëpi për mysafirë do të paguajnë një tarifë prej 5% të kostos së akomodimit për natë, deri në maksimumin e pesë netëve rresht. Kjo tarifë do të mblidhet nga ofruesit e akomodimit në emër të autoriteteve lokale.

Sipas Këshillit të Qytetit të Edinburgh-it, kjo masë synon të adresojë ndikimin e turizmit në burimet e qytetit dhe të mbështesë zhvillimin e qëndrueshëm. Në vitin 2023, Edinburgh priti rreth 5 milionë vizitorë, të cilët shpenzuan mbi 2.2 miliardë £. Me këtë taksë, këshilli pret të mbledhë 45-50 milionë £ në vit deri në 2028 ose 2029.

Vendimi pasoi konsultimet me banorët dhe bizneset, ku shumica e tyre e mbështetën taksën, megjithëse 62% e vizitorëve u shprehën kundër saj ose propozuan një tarifë më të ulët.

Kjo masë pason aktin "Visitor Levy (Scotland)" që hyri në fuqi në korrik 2024, duke vendosur që të ardhurat nga taksa të përdoren për përmirësimin e shërbimeve dhe objekteve që shfrytëzohen nga turistët dhe banorët.

Edinburgh tani i bashkohet qyteteve si Amsterdami dhe Venecia, të cilat kanë zbatuar taksa turistike për të adresuar mbingarkesën dhe për të mbështetur zhvillimin lokal.