Janë publikuar pamjet e para të filmit të ardhshëm, “Death of a Unicorn”, i cili e fton publikun në një tregim të errët dhe komik ku fantazia dhe realiteti përplasen.

Protagonistë të filmit janë aktorët e njohur të Hollywoodit, Paul Rudd dhe Jenna Ortega. Ata vijnë në rolin e një babai dhe vajzës së tij, të cilët pësojnë aksident me veturë dhe kjo ngjarje i shpie në një kaos të udhëhequr nga lakmia. Elliot dhe Riley e bëjnë të pamundurën ta fshehin krimin e vrasjes së një krijese magjike të njohur si ‘unicorn’, por pastaj kuptojnë se gjaku dhe copat nga briri i kësaj krijese mund të kurojnë kancerin. Gjithçka komplikohet kur shefi miliarder i Elliotit, i portretizuar nga aktori Richard E. Grant, tenton të shfrytëzojë vetitë e mrekullueshme kuruese të krijesës.

“Death of a Unicorn” e shënon debutimin regjisorial të Alex Scharfmanit dhe është xhiruar në Hungari, në vende skenike të cilat i sjellin thellësi dhe atmosferë përrallës fantastike. Pjesë e kastës janë edhe aktorët, Will Poulter, Téa Leoni, Richard E. Grant, Anthony Carrigan, Sunita Mani dhe Jessica Hynes.

Ende nuk ka datë të caktuar të lansimit nëpër kinema, por filmi pritet të jetë në dispozicionin e publikut kah pranvera e këtij viti.