Në një betejë të ashpër në arkat filmike të fundjavës, filmi “Sonic the Hedgehog 3” arriti të dominonte në Shtetet e Bashkuara, duke fituar 62 milionë dollarë, dyfishin e shifrës prej 35 milionë dollarësh që mori filmi “Mufasa”, konkurrenti i drejtpërdrejtë i filmit “The Lion King” nga gjigandi “Disney”. Entertainment Weekly ka shkruar, që, ani pse “Mufasa” pati sukses global, duke grumbulluar 122 milionë dollarë në 53 territore, “Sonic” mbajti epërsinë në tregun amerikan, duke realizuar fitim të madh në më pak kinema.

Përkundër kësaj, rivalët e tjerë të javës, filmat “Wicked" dhe “Moana II”, vazhduan të qëndrojnë mirë në arkat filmike, me “Wicked” që udhëhoqi në shifra të përgjithshme, duke mbledhur 384 milionë dollarë në Shtetet e Bashkuara, ndërsa “Moana II” arriti 359 milionë dollarë.

Sidoqoftë, në tregun ndërkombëtar, “Moana II”  kishte performancë shumë më të mirë, duke grumbulluar 790 milionë dollarë krahasuar me 571 milionë dollarët e “Wicked”.

Një tjetër film që u shënoi sukses këtë fundjavë ishte “Homestead” nga kompania “Angel Studios”, që, edhe pa mbështetje nga studio të mëdha dhe pa yje të njohur, fitoi 6 milionë dollarë në javën e tij të parë.

Filmi “Gladiator II”  i regjisorit Ridley Scott, ra në vendin e gjashtë pas pesë javësh në kinema, ndërsa “Kraven the Hunter” dështoi të krijonte prani të madhe pas javës së tij të dytë në kinema.

Një tjetër film që mbajti pozicion të mirë në tabelë ishte komedia festive “The Best Christmas Pageant Ever”, që ka mbetur në top 10-të pas shtatë javësh në kinema.