Këngëtarja me famë botërore, Janet Jackson, ka kërkuar falje publikisht pasi kishte thënë se kandidatja për presidente të SHBA-së, Kamala Harris, nuk i takon racës së zezë, duke i bërë bujë një pretendimi të rrejshëm të rivalit të saj, Donal Trump.

58 vjeçja, ka bërë një koment të papritur për zëvendëspresidenten kur u pyet se si do të ndihej nëse Harris do të bëhej gruaja e parë me ngjyrë presidente e SHBA-së
.
Në një deklaratë të re për Buzzfeed, menaxheri i Jacksonit, Mo Elmasri ka thënë se ajo ka respekt të madh për Harrisin dhe arritjet e saj si një grua me ngjyrë dhe indiane.

“Janet kërkon falke për paqartësinë e shkaktuar dhe e njeh rëndësinë që paraqet diskursi publik. Ne jemi mirënjohës që patëm mundësi të adresojmë këtë çështje dhe do të mbetemi të përkushtuar në promovimin e unitetit”, ka thënë Elmasri.
Krijuesja e hitit “All Of You” ka thënë se zëvendëspresidentja nuk është e racës së zezë.

“Kështu kam dëgjuar. Se është indiane. Babanë e ka të bardhë. Kështu më kanë thënë”, pati thënë Jackson.

Ajo ka pranuar gjithashtu se nuk i kishte parë lajmet për disa ditë dhe se dikush e kishte zbuluar se babai i Harrisit ishte i racës së bardhë.

Harris është bija e Shyamala Gopalan, hulumtuese e kancerit nga India, dhe Donald Harris, profesor i ekonomisë, me prejardhje nga Xhamajka, që i përket racës së zezë.

Gopalan ka vdekur nga kanceri në moshën 70 vjeçare në vitin 2009, kurse Donald është 86 vjeç dhe është profesor i ekonomisë në Universitetin e Stanfordit.

Komentet e Jacksonit erdhën pasi Trump kishte bërë disa deklarime të ngjashme gjatë një fjalimi në konventën e Asociacionit të Gazetarëve me Ngjyrë në muajin korrik në Chicago.

“Harris gjithnjë ka mbështetur trashëgiminë indiane. Nuk e kam ditur se i përket racës së zezë deri disa vite më parë, ku u bë e racës së zezë dhe tani dëshiron të njihet si e tillë”, pati thënë Trump në tubim.

Harris ka folur hapur për prejardhjen e saj dhe se si është rritur duke vlerësuar të dyja racat. Ajo ka shkuar në Universitetin e Howardit, kolegj historikisht i njohur si i racës së zezë, i cili ndodhet në Washington.

Në vitin 2021 ajo pati treguar se si babi i saj e kishte dërguar atë bashkë me motrën e saj në një koncert të këngëtarit të njohur me prejardhje nga Xhamajka, Bob Marley.

“Më kujtohet që ishim ulur në ulëset e pasme të teatrit dhe e shikoja performancën. Isha shumë e ngazëllyer. Edhe sot, i di pothuajse të gjitha tekstet e këngëve të Bob Marleyt. Babi im, si shumë xhamajkanë të tjerë, krenohet shumë që kemi prejardhje nga atje dhe na e ka përcjellë të njëjtën krenari edhe mua e motrës. E duam Xhamajkën. Ai na ka mësuar historinë e vendit nga i cili vijmë, vuajtjet dhe bukuritë e popullit xhamajkan dhe pasurinë e kulturës së tyre”, pati thënë Harris.