Nagavci: Mbi 194 mijë prindër kanë aplikuar për subvencionim të librave

Vendi | 28.08.2024 Ora 9:10

Ministrja e Arsimit, Shkencës, Teknologjisë dhe Inovacionit, Arbërie Nagavci, ka njoftuar se deri më tani kanë aplikuar gjithsej 194.180 prindër, ose kujdestarë ligjor për subvencionimin e teksteve dhe materialeve shkollore.

Ajo ka bërë të ditur se deri më tani janë subvencionuar gjithsej 171.200 aplikues.

"Vazhdon subvencionimi për tekste dhe materiale shkollore. Kam kënaqësinë të ju informoj se deri sot kanë aplikuar gjithsej 194.180 prindër ose kujdestarë ligjor për subvencionimin e teksteve dhe materialeve shkollore.

Ndërkaq, janë subvencionuar gjithsej 171.200 aplikues. Procesi i transferimit të mjeteve është duke vazhduar edhe sot.

Çdo rast i adresuar në numrin e telefonit dhe në email adresën [email protected] është trajtuar me prioritet dhe u është ofruar ndihma e nevojshme për aplikim dhe përfitim të këtyre mjeteve.

Ashtu siç e kemi thënë, asnjë nxënës nuk do të mbetet pa tekste shkollore dhe si asnjëherë më parë gjithçka është gati për fillimin me kohë e të mbarë të vitit shkollor", ka shkruar në Facebook ministrja Nagavci.