Frika për një rregullore të re të Bashkimit Evropian që do të rrezikojë furnizimet e kafesë në Gjermani dhe në përgjithësi në Evropë, është rritur, raportoi mediumi gjerman “Bild”.

Çmimet mund të rriten ndjeshëm, ka paralajmëruar Shoqata Gjermane e Kafes me qendër në Hamburg.
"Jemi të kërcënuar me mungesë të furnizimit në tregjet gjermane dhe evropiane”, ka njoftuar kjo shoqatë.

Bëhet fjalë për rregulloren e BE-së për zinxhirët e furnizimit pa shpyllëzim, e cila do të zbatohet nga 31 dhjetori. Në të ardhmen, kompanitë do të duhet të dëshmojnë se asnjë pyll nuk është pastruar apo dëmtuar për produktin e tyre. Kjo nuk vlen vetëm për lëndët e para si kakao ose kokrrat e kafesë, por mbulohen edhe disa produkte dytësore si çokollata, lëkura ose mobiljet. Shkeljet përballen me dënime të larta prej të paktën katër për qind të qarkullimit vjetor në BE.

Komisioni i BE-së pretendon se nuk dihen fakte se rregullorja do të rrisë çmimet e ushqimeve.
Mbështetja e fermerëve të vegjël është prioritet dhe ligji nuk paraqet kufizim të fshehur në tregti.

Holger Preibisch, drejtor menaxhues i shoqatës së kafesë, bën thirrje që aplikimi të shtyhet. Përndryshe, ekzistenca e miliona fermerëve të kafesë në mbarë botën do të kërcënohej.

"Aktualisht vetëm rreth 20 për qind e fermerëve i plotësojnë kërkesat”, ka thënë Preibisch. Ai ankohet edhe për barrën burokratike dhe vështirësitë në marrjen e informacionit të nevojshëm.

Prodhuesit e mëdhenj të kafesë si Alois Dallmayr KG janë gjithashtu kritikë ndaj rregulloreve të reja të BE-së. Pjekësit e kafesë Lavazza, Melitta dhe Darboven ("Idee-Kaffee", "Mövenpick") duan të pajtohen me ligjin e BE-së, por po kërkojnë më shumë kohë.

“Pasojat do të jenë mungesë e qartë në furnizimin e kafesë jeshile dhe si rezultat çmimet do të rriten”, thotë një zëdhënëse e Darboven.

Gjermania është importuesi i dytë më i madh i kafesë në botë pas SHBA-së, me 1.1 milionë tonë në vit. Pjesa kryesore vjen nga Brazili (30 për qind) dhe Vietnami (20 për qind).