Banka Botërore ka raportuar të hënën se çmimet e naftës mund të shkojnë drejt “ujërave të paeksploruara” nëse dhuna midis Izraelit dhe Hamasit intensifikohet, gjë që mund të rezultojë në rritje të çmimeve të ushqimeve në mbarë botën.

Sulmi ndaj Izraelit nga Hamasi dhe më pas operacioni ushtarak i Izraelit kundër Hamasit, kanë shtuar frikën për një konflikt më të gjerë në Lindjen e Mesme. Dhe rreziku i përshkallëzimit afrohet.

Tanket dhe këmbësoria izraelite u futën në Gaza gjatë fundjavës, teksa kryeministri izraelit, Benjamin Netanyahu njoftoi për një “fazë të dytë” në luftë. Zyrtarët e Hamasit kanë bërë thirrje për më shumë ndihmë rajonale nga aleatët, duke përfshirë Hezbollahun.

Raporti i Bankës Botërore simulon tre skenarë për furnizimin global të naftës në rast të një ndërprerjeje të vogël, të mesme ose të madhe.

Efektet duhet të kufizohen nëse konflikti nuk zgjerohet në një skenar “përçarje e vogël” - pasi çmimet e naftës pritet të bien në një mesatare prej 81 dollarë për fuçi vitin e ardhshëm, vlerëson Banka Botërore.

Por gjatë një “ndërprerjeje mesatare” - ekuivalente me ndërprerjet e përjetuara gjatë luftës në Irak - çmimet e naftës do të rriteshin me afër 35%.

Në një skenar të “ndërprerjes së madhe” - të krahasueshme me embargon e naftës arabe të vitit 1973 - furnizimi global i naftës do të tkurret me 6 milionë deri në 8 milionë fuçi në ditë dhe çmimet mund të rriten me 56% në 75%, ose 140 deri në 157 dollarë për fuçi, sipas raportit.

Indermit Gill, kryeekonomisti i Bankës Botërore, ka theksuar se pushtimi rus i Ukrainës ka pasur tashmë efekte shkatërruese në ekonominë globale “që vazhdojnë edhe sot e kësaj dite”.

“Nëse konflikti do të përshkallëzohej, ekonomia globale do të përballej me një goditje të dyfishtë energjetike për herë të parë në dekada – jo vetëm nga lufta në Ukrainë, por edhe nga Lindja e Mesme”, ka thënë Gill.

Ayhan Kose, zëvendëskryekonomisti i Bankës Botërore, ka treguar se çmimet më të larta të naftës do të rezultojnë në mënyrë të pashmangshme në çmime më të larta të ushqimeve.

Disa analistë janë skeptikë se SHBA-ja do të përjetonte mungesa masive të naftës, pasi prodhimi i naftës në SHBA është në nivelin më të lartë të të gjitha kohërave.

Në një ngjarje të Bloombergut të enjten, Sekretarja e Thesarit, Janet Yellen ka theksuar se administrata e Bidenit po monitoronte me kujdes pasojat ekonomike të luftës së Izraelit kundër Hamasit.

“Deri më tani, ne nuk kemi parë shumë pasoja globale”, është shprehur ajo, por nëse lufta përhapet “sigurisht që mund të ketë pasoja më kuptimplote”.

Drejtori Ekzekutiv i Agjencisë Ndërkombëtare të Energjisë, Fatih Birol ka theksuar se midis pushtimit të Rusisë dhe dhunës së fundit midis Izraelit dhe Hamasit në Gaza, “askush nuk mund të më bindë se nafta dhe gazi janë zgjedhje të sigurta energjetike për vendet ose konsumatorët”.