Nëse kryeministri britanik Rishi Sunak ka sukses në miratimin e ligjit që ka prezantuar, do të thotë se një 14-vjeçar sot, kurrë nuk do të jetë në gjendje të blejë ligjërisht cigare në Angli.

Ligji i ri do të ndalonte shitjen e duhanit te të gjithë ata që kanë lindur pas 1 janarit të vitit 2009.

Sunaku ka prezantuar ligjin kundër duhanit në një konferencë të Partisë Konservatore që u mbajt gjatë kësaj jave në Manchester.

Kryeministri ka thënë se çdo vit do të ngrihet mosha për blerje të duhanit.

Ai gjithashtu ka premtuar masa për ta ndalur konsumimin e cigareve elektronike nga të rinjtë.

Ngritja e moshës për shitjen e produkteve të duhanit cilësohet si hap vendimtar në planet e shtetit për gjeneratë pa duhan.

Sipas organizatave të shëndetësisë, konsumimi i duhanit është shkaktari më i madh i kancerit në Angli. Dhe nga duhani çdo vit shtrohen në spitale gjysmë milioni njerëz./koha/