Një familje që pastronte mbeturinat në një plazh të New Jerseyt zbuloi një mesazh në një shishe që me sa duket ishte hedhur në ujë në Irlandë rreth katër vjet më herët.

Frank Bolger tha se ishte duke vizituar plazhin në Wildwood me gruan e tij, Karen, dhe mbesën, Autumn, kur gjetën një shishe me një copë letre brenda.

“Ne e gjetëm shishen në disa alga deti pikërisht në buzë të ujit”, tha Bolger për IrishCentral. “Duhet ta çonim në shtëpi për të marrë letrën brenda sepse ishte bllokuar në shishe”.

Shënimi ishte i datës 17 korrik 2019 dhe ishte i nënshkruar nga “Aoife”.

“Përshëndetje nga Irlanda”, thuhet në shënim. "Unë e kam hedhur këtë shishe në det që dikush ta gjejë një ditë tjetër. Ndoshta ka udhëtuar deri në Afrikë ose në Islandë! Nuk do ta di nëse dikush e ka gjetur këtë, por shpresoj që të gjendet”.

Familja e ndau mesazhin e shishes me revistën “The Wildwood Sun by the Sea”, e cila postoi foto të mesazhit në Facebook me shpresën për të gjetur dërguesin.