OpenAI, ka njoftuar të mërkurën se ka blerë kompaninë e produkteve digjitale “Global Illumination”, duke shënuar kështu blerjen e parë nga firma e njohur e inteligjencës artificiale.

Detajet financiare të marrëveshjes nuk janë zbuluar, raportoi të mërkurën Reuters.

"I gjithë ekipi (Global Illumination) i është bashkuar OpenAI-së për të punuar në produktet tona kryesore duke përfshirë ChatGPT-në", ka thënë kompania.

Global Illumination me bazë në Nju Jork u themelua në vitin 2021 nga Thomas Dimson, Taylor Gordon dhe Joey Flynn, të cilët kanë punuar më parë në Instagram të Meta Platforms.

Global Illumination së fundmi ka punuar në teknologjinë me burim të hapur në lidhje me prodhimin e lojërave në internet.