Atleti nga Zelanda e Re, Sam Ruthe, shkroi histori të mërkurën duke u bërë personi më i ri që ka vrapuar një milje nën katër minuta.

Ruthe, i cili mbush 16 vjeç në prill, regjistroi një kohë prej 3:58.35 në Go Media Stadium në Auckland. Ai theu rekordin e mëparshëm të mbajtur nga norvegjezi Jakob Ingebrigtsen, i cili kishte realizuar këtë arritje me një kohë prej 3:58.07 kur ishte 16 vjeç.

Në garën historike, Ruthe u ndihmua nga dy herë olimpisti Sam Tanner, i cili e drejtoi për katër xhiro në pistën e lagur nga shiu, duke e ndihmuar të kalonte vijën e finishit pak pas pesë herë kampionit të Zelandës së Re.

“Kjo ishte ndoshta arritja ime më e preferuar. E kam shijuar më shumë se çdo tjetër, veçanërisht me të gjithë këta njerëz që më mbështetën,” tha Ruthe pas garës.

Ky sukses vjen pas triumfit të tij në fillim të muajit në Kampionatin Kombëtar të Atletikës së Zelandës së Re, ku u bë kampioni më i ri ndonjëherë në kategorinë senior në garën e 3,000 metrave me kohën 7:56.18.

Me këtë rezultat, Ruthe e përmirësoi kohën e tij të mëparshme prej 4:01.72 dhe theu rekordin kombëtar të kategorive nën-19 dhe nën-20 të mbajtur nga Tanner (3:58.41).

Milja nën katër minuta mbetet një nga sfidat më të mëdha në atletikë, e cila u arrit për herë të parë nga britaniku Roger Bannister në vitin 1954. Megjithëse përparimet në teknologjinë e stërvitjes dhe këpucëve e kanë bërë më të zakonshme këtë arritje, ajo vazhdon të mbetet një moment historik për vrapuesit e distancave të mesme.