Parlamenti gjerman ka votuar me shumicë të madhe për të rritur ndjeshëm shpenzimet në mbrojtje dhe infrastrukturë, duke shënuar një ndryshim të madh për politikën financiare të vendit.

Me një shumicë prej dy të tretash në Bundestag, ligjvënësit miratuan krijimin e një fondi prej 500 miliardë eurosh, i cili do të përjashtojë investimet në mbrojtje dhe siguri nga rregullat e rrepta të borxhit në Gjermani. Kjo lëvizje vjen në një moment kritik për Evropën, mes pasojave të pushtimit rus të Ukrainës dhe pas sinjaleve të pasigurta nga SHBA për angazhimin ndaj NATO-s.

Megjithatë, ligji duhet të marrë miratimin edhe nga dhoma e sipërme, Bundesrat, e cila pritet të votojë të premten. Ky vendim është një fitore e madhe politike për Friedrich Merz, liderin e CDU-së dhe të mandatuarin për kancelar të Gjermanisë, i cili e cilësoi votimin si "hapi i parë i madh drejt një komuniteti të ri të mbrojtjes evropiane".

Përveç mbrojtjes, fondi i ri do të financojë projekte të mëdha infrastrukturore, si rrugë, ura dhe masa për ndryshimet klimatike, një kërkesë kyçe e Partisë së Gjelbër. Vendimi pritet të ketë ndikim të madh në formësimin e politikës evropiane të mbrojtjes dhe të ardhmen ekonomike të Gjermanisë.