Forever 21 po përballet me një tjetër krizë financiare. Kompania e saj operuese në SHBA ka shpallur falimentimin për herë të dytë në gjashtë vjet, duke e justifikuar këtë hap me konkurrencën e ashpër nga gjigantët ndërkombëtarë të modës së shpejtë.

Pavarësisht falimentimit, Forever 21 ka deklaruar se dyqanet dhe faqja e saj e internetit në SHBA do të qëndrojnë të hapura për momentin, ndërsa planifikon një "mbyllje të rregullt" të operacioneve. Kompania po kërkon gjithashtu një blerës për një pjesë ose të gjitha asetet e saj, ndërsa paralajmëron likuidime në dyqanet e mbetura.

Sipas Brad Sell, zyrtarit kryesor financiar të Forever 21, kompania nuk ka arritur të gjejë një model të qëndrueshëm biznesi përballë konkurrencës nga markat si Shein dhe Temu, kostove në rritje dhe ndryshimeve të preferencave të konsumatorëve. Për më tepër, tarifat e shtuara për importet kineze gjatë administratës Trump e kanë bërë situatën edhe më të vështirë.

Forever 21 ka luftuar për të mbajtur hapin me tregtinë online, veçanërisht pas pandemisë, dhe nuk ka arritur të përshtatet me trendet e reja. Analistët thonë se mungesa e një vizioni të qartë dhe ofertave tërheqëse ka bërë që të rinjtë të braktisin markën.

Në vitin 2019, Forever 21 shpalli për herë të parë falimentimin dhe mbylli 200 dyqane. Më vonë, u ble nga një grup investitorësh për 81 milionë dollarë, çka i dha një shans të dytë për të mbijetuar. Por edhe pas këtij ristrukturimi, perspektiva mbeti e zymtë.

Në vitin 2023, mbi 7,300 dyqane u mbyllën në SHBA, një rritje prej 57% krahasuar me vitin e kaluar. Me Forever 21 që i bashkohet kësaj liste të gjatë, duket se epoka e tij si një ikonë e modës së shpejtë po i vjen fundi.