Ministria e Financave, Punës dhe Transfereve, ka njoftuar se ka filluar me angazhimin ekipeve mobile për qëllim të lajmërimit të pensionistëve mbi moshën 85 vjeçare, nëpër shtëpitë/banesat e tyre në regjionin e Prishtinës.

Sipas njoftimit të Ministrisë ky shërbim ka filluar të zbatohet fillimisht në regjionin e Prishtinës, në komunën e Prishtinës, Fushë-Kosovës, Drenasit, Lipjanit, Podujevës, Obiliqit dhe Graqanicës, si pilot-projekt, për të vazhduar pastaj edhe në regjionet dhe grup moshat e tjera.

“Kërkesa mund të paraqitet individualisht nga pensionisti apo nga çdo preson tjetër që e bën në emër të pensionistit. Kërkesat e tilla janë vlefshme vetëm nëse konfirmohet pranimi i shkresë elektronike, përndryshe kërkesa duhet të përsëritet”, thuhet në njoftim.

Në kërkesë pensionistët duhet të paraqesin të dhënat si në vijim: emri dhe mbiemri i pensionistit, numri personal i pensionistit, numri i telefonit të pensionistit (nëse ka – preferohet numër i mobilit), numri i telefonit të një personi të afërt të pensionistit dhe adresa e banimit të pensionistit dhe përshkrimi shtesë lidhur me adresën.

“Pensionistit do t’i konfirmohet që kërkesa është pranuar, dhe pas verifikimit të të dhënave sipas kritereve të përcaktuara më lartë do të njoftohet për realizimin e vizitës përafërsisht 24 orë më herët, përfshirë këtu edhe ditët e vikendit”, thuhet në njoftim.

Sipas Ministrisë pensionistët të cilëve nuk ju aprovohet kërkesa për shkak të mos plotësimit të kritereve, duhet të vazhdojnë të paraqiten për lajmërim tek zyrat e pensioneve.