Fotot e ushqimit të krijuara me inteligjencë artificiale po bëhen gjithnjë e më të zakonshme në menytë e restoranteve, por në vend që të nxisin oreksin, në shumë raste po shkaktojnë efektin e kundërt.

Imazhet e krijuara me AI shpesh paraqesin ushqimin me ngjyra tepër të forta, forma të përsosura dhe tekstura jo reale. Për këtë arsye, në rrjetet sociale janë quajtur edhe “AI slop menus”, ndërsa disa klientë thonë se ushqimi në këto fotografi duket më shumë si plastikë apo diçka e krijuar në kompjuter.

Ekspertët shpjegojnë se njerëzit janë veçanërisht të ndjeshëm ndaj pamjes së ushqimit, pasi truri e lidh atë edhe me sigurinë dhe mundësinë që ushqimi të jetë i përshtatshëm për t’u konsumuar. Studimet kanë treguar se fotografitë e ushqimit të krijuara me AI mund të perceptohen si më pak tërheqëse dhe të ulin dëshirën për ta ngrënë atë.

Përdorimi i AI në marketing po rritet edhe në industrinë e gastronomisë, sidomos për shkak të kostos më të ulët. Megjithatë, ekspertët paralajmërojnë se fotografitë që nuk përputhen me ushqimin real mund të zhgënjejnë klientët dhe të dëmtojnë reputacionin e bizneseve.

Për restorantet, këshilla është e thjeshtë: më mirë një fotografi reale e bërë me telefon sesa një pjatë perfekte që ekziston vetëm në ekran.