Hobet si lojërat në tavolinë, muzika, thurja dhe qepja po përjetojnë një rikthim në SHBA, duke ndikuar edhe në tregun e punës.

Sipas të dhënave të Byrosë së Statistikave të Punës, gjatë 18 muajve deri në qershor, dyqanet e hobeve, lodrave dhe lojërave krijuan rreth 35 mijë vende pune, një rritje prej 29 për qind. Grupet muzikore dhe artistët shtuan 9 mijë vende pune, ndërsa dyqanet e qepjes, punimeve me dorë dhe materialeve tekstile shtuan rreth 7 mijë.

Rritja lidhet me faktin se konsumatorët po kërkojnë mënyra më të vogla dhe më të përballueshme për t’u argëtuar, pas viteve të inflacionit që kanë vështirësuar blerjet e mëdha. Në të njëjtën kohë, të rinjtë po rikthehen te hobet tradicionale, të njohura edhe si “hobet e gjyshes”.

Edhe rrjetet sociale kanë ndihmuar në këtë trend, veçanërisht për artistët e rinj. Një shembull është grupi rock “Untitled”, i cili u bë viral në TikTok dhe më pas siguroi kontratë diskografike dhe një turne në Britani.

Ekspertët vlerësojnë se pas këtij trendi qëndron edhe nevoja e njerëzve për komunitet dhe kontakte reale, në një kohë kur inteligjenca artificiale po bëhet pjesë e gjithnjë e më shumë aspekteve të jetës.