Banka Qendrore Evropiane (BQE) ka përzgjedhur 36 banka dhe kompani të pagesave për të testuar euron digjitale në një program pilot që pritet të nisë në gjysmën e dytë të vitit 2027.

Në projekt do të marrin pjesë emra të njohur si Deutsche Bank, UniCredit, Revolut, Adyen dhe Stripe.

Sipas BQE-së, euroja digjitale nuk do ta zëvendësojë paranë fizike, por do të ofrojë një mënyrë shtesë dhe pa pagesë për kryerjen e pagesave. Ajo nuk do të gjenerojë interes dhe do të ketë kufizime në shumën që mund të mbahet.

Përdorimi i saj varet nga miratimi i legjislacionit nga Parlamenti Evropian dhe shtetet anëtare të BE-së. Nëse miratohet sipas planit, euroja digjitale mund të jetë e disponueshme për qytetarët në vitin 2029.

Presidentja e BQE-së, Christine Lagarde, ka deklaruar se projekti synon të forcojë sistemin evropian të pagesave dhe të zvogëlojë varësinë e Bashkimit Evropian nga rrjetet ndërkombëtare të pagesave.