Migrena është një gjendje neurologjike që prek miliona njerëz në botë, shpesh duke ndikuar negativisht në jetën e përditshme. Për shumë persona, medikamentet janë një ndihmë, por jo gjithmonë të efektshme. Kjo është arsyeja pse shumë prej tyre kërkojnë metoda alternative për të menaxhuar dhimbjet e forta – nga përdorimi i kompresa të nxehta e të ftohta, banja të ngrohta, maska për sytë, e deri tek "hack-et" e fundit që qarkullojnë në rrjetet sociale.

Një prej tyre që është bërë viral së fundmi është kombinimi i një pije të gazuar me kafeinë dhe sheqer, si Coca-Cola, me një porcion patate të skuqura të kripura – i njohur si "McMigraine meal". Disa persona thonë se ky kombinim mund të ndihmojë në lehtësimin e simptomave të migrenës, falë efektit të kafeinës dhe kripës që mund të ndikojnë tek aktiviteti i nervave.

Por, ekspertët theksojnë se migrena është një gjendje shumë komplekse që nuk mund të trajtohet me një zgjidhje të vetme. Ndërsa kafeina në disa raste mund të ndihmojë, ajo gjithashtu mund të jetë një nxitës i migrenës tek disa persona. Po ashtu, konsumimi i shpeshtë i ushqimeve të përpunuara, të larta në natrium dhe përbërës si tyramina, mund të ketë një efekt negativ, duke përkeqësuar gjendjen.

Migrena nuk është thjesht një dhimbje koke – ajo mund të shoqërohet me dhimbje në qafë, mpirje, turbullim të shikimit, dhe madje të ndikojë në të folur dhe lëvizje. Ajo mund të zgjasë me ditë të tëra, duke e bërë jetën e përditshme të vështirë për t'u menaxhuar.

Ekspertët theksojnë rëndësinë e një stili jetese të rregullt, shmangien e faktorëve që mund të shkaktojnë migrenën, dhe ndjekjen e trajtimeve të përshtatshme mjekësore. Ndërkohë që kërkimet po vazhdojnë për të gjetur trajtime më të efektshme, është e rëndësishme që individët të konsultohen me mjekun e tyre për të gjetur mënyrën më të mirë për të menaxhuar këtë gjendje.