Elton John ka kritikuar Administratën e Presidentit Trump, për shkurtimet buxhetore karshi projekteve të USAID.

Administrata Trump njoftoi planet të enjten (27 shkurt) për të eliminuar më shumë se 90% të kontratave të ndihmës së huaj të Agjencisë së SHBA për Zhvillim Ndërkombëtar, si dhe 60 miliardë dollarë në ndihmën e përgjithshme të SHBA në mbarë botën, sipas Associated Press. USAID ka qenë ofruesi më i madh i ndihmës në botë për dekada.

“Vendimi i papritur i administratës së SHBA-së për të shkurtuar mbi 90% të kontratave të USAID-it mund të ketë efekte shkatërruese në përgjigjen ndaj HIV-it”, shkroi John në Instagram të shtunën (1 mars) së bashku me një deklaratë zyrtare nga Fondacioni i tij Elton John AIDS.

John themeloi Fondacionin Elton John AIDS në 1992 për të financuar kërkime që synojnë çrrënjosjen e HIV dhe AIDS. Gjatë tre dekadave të fundit, organizata është rritur në një nga organizatat më të mëdha të pavarura bamirëse në botë për AIDS.