Qeveria Australiane ka shpallur rregulla të reja që detyrojnë kompanitë e mëdha teknologjike, si Meta, Google dhe TikTok, të paguajnë për përmbajtjen e lajmeve lokale. Këto rregulla, që hyjnë në fuqi në janar 2025, synojnë të forcojnë financimin e gazetarisë cilësore duke vendosur një skemë të re të quajtur News Bargaining Incentive.

Kompanitë që fitojnë mbi 250 milionë dollarë australianë në vit (160 milionë dollarë amerikanë) do të duhet të hyjnë në marrëveshje me botuesit ose të përballen me taksa më të larta. Ndryshe nga ligji i mëparshëm i vitit 2021, skema e re i detyron kompanitë të kontribuojnë financiarisht, edhe nëse nuk arrijnë marrëveshje me organizatat mediatike.

Meta, e cila zotëron Facebook dhe Instagram, e kundërshton këtë nismë duke e cilësuar si një "ngarkesë për industrinë e teknologjisë për të subvencionuar një tjetër sektor". Meta ka deklaruar më herët se lajmet zënë më pak se 3% të përmbajtjes në Facebook, duke refuzuar të rinovojë marrëveshjet e mëparshme, çka solli një humbje prej 200 milionë dollarësh australianë për botuesit.

Qeveria australiane synon të mbushë boshllëkun e krijuar nga përmbajtja e lajmeve dhe të parandalojë përhapjen e dezinformatave në platformat digjitale. Marrëveshjet e reja do të përfshijnë financimin e gazetarisë në këmbim të lehtësimeve tatimore.