Kryetari i Prishtinës, Përparim Rama, ka njoftuar se 10 mijë udhëtarë më shumë në ditë po përdorin Trafikun Urban që nga "reforma" me biletën ditore.

Në muajin janar, Komuna e Prishtinës vendosi që bileta njëdrejtimëshe në Trafikun Urban të rritej për 10 centë dhe të bëhej 50 centë. Por vuri në funksion edhe biletën ditore, e cila kushton 80 centë dhe është e vlefshme 24 orë në çdo linjë të Trafikut Urban.

“10.000 udhëtarë më shumë po përdorin autobusët e “Trafiku Urban”, si rezultat i vendimit të marrë në muajin janar të këtij viti për përdorimin e biletës ditore”, ka shkruar Rama në Facebook.

Postimi i tij u plotësua nga komenti i nënkryetarit të Komunës së Prishtinës, Alban Zogaj, i cili bëri të ditur se bëhet fjalë “në ditë”.

Rama ka paralajmëruar edhe një herë se shumë shpejt Trafikut Urban do t’i shtohen 30 autobusë të rinj, gjashtë prej të cilëve elektrikë./koha/