Këshilli i Sigurimit i Kombeve të Bashkuara ka mbajtur takimin e tij të parë mbi inteligjencën artificiale të martën, ku është diskutuar mbi rreziqet e saj, raportoi të mërkurën Reuters.

Gjatë këtij takimi Shtetet e Bashkuara të Amerikës kanë paralajmëruar kundër përdorimit të kësaj teknologjie në rast të censurimit apo shtypjes së njerëzve.

Sekretari i Jashtëm i Britanisë, James Cleverly, i cili kryesoi takimin nën presidencën britanike të organit, ka thënë se inteligjenca artificiale do të ndryshojë rrënjësisht çdo aspekt të jetës njerëzore.

"Duhet urgjentisht ta formësojmë qeverisjen globale të teknologjive transformuese sepse AI-ja nuk njeh kufij", shtoi ai pasi tha se kjo teknologji mund të ndihmojë në adresimin e ndryshimeve klimatike dhe të nxisë ekonomitë.

Sekretari i Përgjithshëm i OKB-së, Antonio Guterres, ka thënë se zbatimet ushtarake dhe joushtarake të AI-së mund të kenë pasoja shumë serioze për paqen dhe sigurinë globale.

Guterres mbështet thirrjet e disa shteteve për krijimin e një organi të ri të OKB-së për të mbështetur përpjekjet kolektive për të qeverisur këtë teknologji të jashtëzakonshme, të modeluar sipas Agjencisë Ndërkombëtare të Energjisë Atomike, Organizatës Ndërkombëtare të Aviacionit Civil ose Panelit Ndërqeveritar për Ndryshimet Klimatike.

Ambasadori i Kinës në OKB, Zhang Jun e përshkroi AI si një "shpatë me dy tehe" dhe tha se Pekini mbështet një rol qendror koordinues të OKB-së në vendosjen e parimeve udhëzuese për Akëtë teknologji.

Zëvendësambasadori i SHBA-së në OKB, Jeffrey DeLaurentis, tha gjithashtu se ka nevojë që vendet të punojnë së bashku në AI dhe teknologji të tjera në zhvillim për të trajtuar rreziqet e të drejtave të njeriut që kërcënojnë të minojnë paqen dhe sigurinë.

"Asnjë shtet anëtar nuk duhet të përdorë inteligjencën artificiale për të censuruar, kufizuar, shtypur ose pafuqishëm njerëzit", është shprehur ai./koha/