Hulumtimet e reja nga Instituti Gjeologjik i Shteteve të Bashkuara kanë treguar se për shkak të peshës së rrokaqiejve dhe ndërtesave të tjera, Nju Jorku po fundoset mesatarisht një deri në dy milimetra në vit, dhe disa pjesë po fundosen shumë më shpejt.

Në pamje të parë, kjo nuk është shqetësuese, por ekspertët janë të shqetësuar nga fakti se ky proces e bën Nju Jorkun jashtëzakonisht të prekshëm ndaj fatkeqësive natyrore, shkruan The New York Post.

Njëri prej tyre është drejtuesi i kërkimit dhe gjeologu Tom Parsons nga Instituti Gjeologjik i Shteteve të Bashkuara, i cili thotë se studimi ka treguar se zona e Lower Manhattan, si dhe Brooklyn dhe Queens, janë veçanërisht në rrezik.

Ai dhe kolegët e tij llogaritën masën kumulative të më shumë se një milion ndërtesave dhe vlerësuan se ishte rreth 764,000,000 tonelata, më pas e ndanë të gjithë zonën në zona 100 metra katrorë dhe kështu llogaritën presionin mbi gurin themelor të secilës zonë.

Ata më pas krahasuan llogaritjet e tyre me imazhet satelitore që mund të matin ndryshimet në lartësinë e sipërfaqes së tokës, dhe hartuan leximet mbi vlerësimet e tyre në mbarë qytetin për të krahasuar modelin e tyre me të dhënat e botës reale.

Sipas raportit të ekspertëve, qyteti, i cili ka rreth 8.4 milionë banorë, po përballet me rrezikun e përmbytjeve sepse në atë zonë rreziku i rritjes së nivelit të detit është tre deri në katër herë më i madh se mesatarja globale përgjatë brigjeve të Atlantikut të Amerikës së Veriut.

Situata mund të përkeqësohet nga uraganet dhe stuhitë që po bëhen gjithnjë e më të shpeshta dhe më të egra, theksoi Parsons, duke kujtuar viktimat dhe dëmet e mëdha të shkaktuara nga dy uraganet e fundit, Sandy (2012) dhe Ida (2021).