Kryeministri Albin Kurti premtoi qasje të re institucionale ndaj rinisë, gjatë pjesëmarrjes në prezantimin e procesit hartues të strategjisë për këtë pjesë të qytetarëve. Në këtë ngjarje, ministri Hajrullah Çeku kritikoi qeveritë e kaluara për mënyrën se si u janë qasur të rinjve.

Qeveria ka nisur ta hartojë strategjinë për të Rinjtë, dokument që pritet të finalizohet dhe të hyjë në fuqi nga viti i ardhshëm.
 

Në prezantimin e procesit hartues të këtij dokumenti që i referohet periudhës 2024-2032, kryeministri Albin Kurti tha se është duke ndryshuar qasja e shtetit karshi rinisë.
 

“Ka ardhur koha të bëhet një investim serioz edhe në vendin tonë dhe Strategjia Shtetërore për Rini është mjeti; mjeti që do të sjellë në tavolinë të gjitha institucionet për të reflektuar mbi sfidat e veçanta të të rinjve në sektorin e tyre dhe për të hartuar e zbatuar politika publike në shërbim të tyre”, tha Kurti.

E, ministri i Kulturës, Rinisë dhe Sportit, Hajrullah Çeku, kritikoi punën që qeveritë e kaluara kanë bërë për të rinjtë.

Në procesin e hartimit të Strategjisë është duke u realizuar edhe një pyetësor me të rinjtë.

Engji Susuri, konsulente në hartimin e dokumentit, tha se qëllimi i tij është që të rinjtë drejtpërsëdrejti të jenë pjesë e procesit.
 

“Po shohim që ka disa sfida që mund të quhen me të reja e që përkojnë edhe me fenomenet që po ndodhin jo vetëm në vendin tonë por edhe globalisht. Pra, shëndeti mendor, ngacmimet seksuale, dhuna në baza gjinore. E dimë që problemet në këto sfida kanë pasur rritje sidomos në 2-3 vjetët e fundit", tha Susuri.
 

Kosova ka strategjinë për rininë e cila është miratuar në vitin 2019 dhe vlen edhe për vitin 2023./koha/