Deputeti i Aleancës për Ardhmërinë e Kosovës (AAK) në Kuvendin e Kosovës, Shemsedin Dreshaj ka reaguar për gjendjen e rrugës Pejë – Rugovë e cila ka pësuar dëmtime të rënda dhe paraqet rrezik për jetën e vizitorëve.

Dreshaj thotë se rruga Pejë-Rugovë është kthyer në rrezik jete për vizitorë e vendas.

“Rruga Pejë Rugovë është në gjendje të mjerueshme. Traseja me gropa te panumërta, me disa-nivele, me rrëshqitje dheu dhe shkëmbinjve. Por më e rrezikshmja është gërryerja e shtresës së rrugës nën asfalt. Kjo rrezikon funksionimin e shumë hoteleve, restoranteve, firmave por çka është më shqetësuese kjo rrugë është kthyer në rrezik permanent për jetën e vizitorëve të shumtë që e frekuentojnë këtë rrugë”, ka shkruar deputeti.

Ai thotë se kjo rrugë që kur është ndërtuar në vitet 1914-1918, deri më sot nuk ka lëvizur traseja e saj.

“Pse po ndodhë kjo sot, me arterien e vetme të Parkut Nacional të Bjeshkëve të Nemura, qe menaxhohet nga shteti?”, ka vijuar tutje opozitari.

Dreshaj ka dhënë alarmin se mund të ndodh më e keqja.