Ka kohë që në shtëpitë dhe zyrat e tyre kanë të vendosur rezervuar të ujit. Kjo pasi banorët e lagjes “Arbëria 3”, në Prishtinë me vite kanë probleme me ujin e pijshëm saktësisht me shtypjen e dobët të ujit.

Banorët e kësaj lagje të kryeqytetit kanë thënë se përveç problemit me ujin, atyre po iu kushton shtrenjtë edhe blerja e rezervuarëve.

“Ky është edhe rezervari të cilin e kemi blerë tani na është dashur ta hapim gropën vetë dhe ta blejmë rezervarin, i cili ka kushtuar 500 euro. E ky modifikimi pastaj dhe mbulimi me beton për të mbetur uji i pastër ka shkuar rreth 2 mijë euro dhe pompat të cilat duhet t’i blejmë tani kushtojnë rreth 1 mijë euro. Pra deri te sigurimi i ujit të pijes në zyre këtu na ka kushtuar deri në 5 mijë euro. I njëjti problem është edhe në shtëpinë time dhe nuk e kam vetëm unë këtë problem, është gjithkund në këtë lagje”, ka deklaruar banori Qëndrim Kryeziu. “Ose ka vetëm kati i parë ka ujë, katet tjera e kanë shtypjen shumë të dobët. Prej kur kanë filluar të ndërtohen banesat ka filluar problemi, nuk ka plan të zgjerimit të qytetit sepse ne e kemi pishinën e ujit ka ujë mjaftueshëm. Por gypat e ujit dhe ndërtimi i qytetit egër dhe pa planë qe 20 vjet na ka sjellë këtu”.

Kryeziu fajin për shtypjen e dobët të ujit ia ka lënë ndërtimit të banesave.

“Pasdite gjithmonë shtypja bije dhe duhet ne si në kohën e Ali Bungut, me rezervar të 1 mijë dhe 2 mijë litrave të furnizohemi. Me ujë kemi problem rregullisht. Ka dy vjet që e kemi problemin e njëjtë. Prej kur ka filluar ndërtimi i banesave ne në shtëpia kemi problem me shtypjen e ujit”, ka thënë tutje ai.

Edhe në ujësjellës kanë thënë se fajtore mund të jetë ndërtesat kolektive.

“Në lagjen ‘Arbëria 3’, kishim probleme të kamotshme dhe ne nuk e dinim se a është problem tek ne apo tek investitorët kur i kanë ndërtuar ato banesa. Çfarë gypash apo tubacionesh kanë vendosur dhe a janë të mjaftueshëm. Pra të gjitha këto me kohë do të shpalosen dhe koordinatori do ta bëjë këtë punë”, ka thënë zëdhënësja e KRU “Prishtina”, Arjeta Mjeku.

Ujësjellësi ka thënë se po punon në gjetjen e një zgjidhjeje për banorët. Këtë po e bën bashkë me komunën.

“Para disa ditësh krye shefi ekzekutiv dhe stafi tjetër ka marrë pjesë në një takim me nën kryetaren e Komunës së Prishtinës, Donjeta Sahatçiu, me ç‘rast kanë biseduar edhe për zgjidhjen e problemit me ujin e pijshëm. Mirëpo edhe për lagjet e tjera sepse nuk është vetëm kjo lagje në kryeqytet që ka probleme me ujin e pijshëm apo edhe me mungesën e shtypjes së ujit. Ne në kompani e kemi zgjedhur një koordinator që do të merret enkas me të gjitha planet operative dhe investimet kapitale për komunën e Prishtinës”, ka thënë Mjeku.

E nënkryetarja Donjeta Sahatçiu, përmes një postimi në rrjetin social Facebook ka thënë se ka pranuar ankesa nga banorët e kësaj lagjeje dhe se komuna është duke e trajtuar këtë problem.

“Problemet e qytetarëve të Kryeqytetit me furnizim e shtypje uji po i trajtojmë një nga një me ekipet tona dhe ekipet në Kompania Rajonale e Ujësjellësit “Prishtina”. Kam pranuar ankesa për probleme të kamotshme që kërkojnë zgjidhje dhe informim të saktë mbi planet e investimeve tona. Me Krenarin, Afërditën e Habibin takuam ekipin e KRU Prishtina për t’u dakorduar për zgjidhjet afatshkurtra dhe afatgjata për banorët e lagjes Arbëria 3 (Rr. Ahmet Krasniqi, Rr. Vicianum, Rr. Bashkim Fehmiu) për të vazhduar me Bërnicë, Kalabri, Muharrem Fejza etj”, ka shkruar ajo.

Problemi me furnizimin me ujë të pijshëm është shumë i shprehur në pikat e larta të qytetit në veçanti gjatë stinës së verës.