Shqipëria ka shënuar një nga nivelet më të larta të tkurrjes së popullsisë në Europë gjatë vitit 2024. Sipas të dhënave të fundit të Eurostat, për çdo 1,000 banorë, popullsia e vendit u zvogëlua me 12 persona si pasojë e migrimit neto.

Kjo nënkupton se vetëm gjatë vitit të kaluar, Shqipëria ka humbur rreth 29 mijë banorë për shkak të emigrimit.

Ndërkohë, mesatarja e vendeve të Bashkimit Evropian rezulton pozitive, me rreth +5.2 persona për 1,000 banorë, duke treguar rritje të popullsisë dhe fuqisë punëtore.

Ekspertët vlerësojnë se Shqipëria po përballet me një sfidë serioze demografike, pasi përveç emigrimit të lartë, edhe lindshmëria ka rënë ndjeshëm. Krahasuar me vende si Polonia, Estonia apo Kroacia, të cilat kanë arritur të stabilizojnë ose përmbysin trendin e emigrimit, Shqipëria vijon të humbasë popullsi çdo vit.